کلام: بشریٰ حزیں۔
پڑھ پنجابی،لکھ پنجابی،بول پنجابی بول
بولی تیری پھلاں ورگی ۔۔ کنڈیاں وچ نہ رول
بول پنجابی بول
ساڈے ٹپے ، ماہئیے دوہڑے گھٹ نئیں کسے توں
اپنی بولی دا گل پا کے ۔۔۔۔۔۔۔ رج وجائیے ڈھول
بول پنجابی بول
بلھا ٫ نانک ، وارث شاہ نوں ، دنیا بھر نے منیا
سانبھ کرو بولی دی جھلیو ۔۔ بولی اے انمول
بول پنجابی بول
گھول کے پیندے جاندے ساڈا ورثہ لوک بگانے
ساڈا سبھ کجھ مکدا جاندا مکدے نئیں ایہہ گھول
بول پنجابی بول
بوہے باری دے بن گھر وچ چانن نئیں جے آؤندا
ہوراں دی بولی دا اپنے منہ توں . جندرا کھول
بول پنجابی بول
