لِخُت: نقی اشرف
میں فیس بُک اُپر لوکیں بہت چھانی پھٹکی تے ایڈ کرنا ہُونیس۔ اُس نی وجہ ہیک ایہہ دی کہ کُوتے کوئی ایسا انتہا پسند شخص یا خاتون نہ ایڈ ہوئی گچھے جس وچ دُوئے کی اختلافِ رائے نا حق دِتے نی ہمت و جرات نہ ویہہ تے او گالم گلوچ اور بدتمیزیار اُتری اَچھیہہ اُٹھی۔
چروکنی گل دی ہیک مولوی ٹائپ جے ممتاز غزنی نامی بندے نی فرینڈ ریکوسٹ آئی۔میں پروفائل پڑھی دیکھی ایڈ کری شوڑے۔ بَلہی بَلہی پتہ لغا او کوئی روائیتی مولوی نئیں، بِچا جور دے۔ فیس بُکار میں اُنھیں نیاں پہاڑی تحریراں نظری آئیاں۔فیر بُجیا اُنھیں نی کوئی کتاو آئی، فیر ہور کتاو، فیر ہور کتاو۔ تُسیں کہائی، جس لیتری وی آخنے،اُس نا تے پتہ ہوسی نا ،بہوں سارے لوک مِلی تے ٹہولیں باجیں کنے کہاء کَپنے ہونے سے۔ اس توں علاوہ ہیک ہور کہائی ہونی۔ تویئیر جیہڑی کالخ لغی نی ہونی تے جدوں توا تتہ ہونا تے اُس اَگ لغنی ،اُس وی آنس کہائی ایہہ آخنے ہونے سئیاں۔ پہلے ہیک چنگاری نظری اینی سی،فیر دو چار،چھ، آٹھ ،دس تے فیر پُورے توئیر چنگاریاں ایہہ چنگاریاں نظری اینیاں سئیاں تے دیکھ دیکھنیاں ساری کالخ سڑی تے توا چِٹا چِٹا جئیا ہوئی اینا سا۔ پرانے بڈھیاں بُڈھے آخنے سے اَج کہائی لغی،اَج کوئی ناٹھی ایہسی۔ میں یو گُل نیہسیس مننا ہُونا تے کدیہہ کدیہہ اے کراں کہ جدوں روٹیاں پکے تھی بعد توا چُلیرا اولیہہ تے اُچے کنے ہیک بلنا آڑہ تویر ماراں تے کہائی لائی شوڑاں ۔ ممتاز غزنی صاو وی اییہہ جی کہائی لائی نی، دیکھ دیکھنیاں اُردو تے خاص کری پہاڑی ادب نی دنیا غزنی غزنی کری ایہہ چھوڑنی۔
ممتاز غزنی صاو کاہنڈیا نے آدمی دے۔ اوویہہ کانڈھی جس کیا آخان ہیک وی دا آخے ‘‘ پونچھا لڑائی لغی نی تے کاہنڈیا والیں کیہہ خطرہ‘‘۔ تھوراڑ کنے پھاغوعہ اُنھیں ناں گراں دا جِتھیں نا نی اُنھیں نی جم پل دی فہ مدتاں ہوئیاں لہور(لاہور) ڈیرے لائے نے نی۔ اوتھین کوتے کالجیچ پڑھانے، یعنی ماشٹر لغے نے، اُویہہ ماشٹر، جس پرانیاں بڈھیاں پُچھنیاں ہونیاں سئیاں آخے ‘‘بچیا ماشٹر ایہہ دیں کہ کُوتے کوئی نوکری لغیئے؟ ‘‘۔ میں کافی چرکا پتہ لغا کہ او ساڑے دور نے تھوراڑیہہ نے مشہور صحافی راجہ انور صاو نے نِکے پراء دے۔ خدا راجہ انور صاو کی سلامت رکھے،مدتاں ہوئیاں اُنھیں کنے ملاقات نئیں ہوئی۔ راجہ صاو نا ذکر آیا تے او سچے وقتیں نئیاں گلاں یاد آئیاں جدوں کُسیہہ نے کِسیہہ مسلے مسائل نی گل اخباراچ چھپی آچھیہہ تے آخنے ہونے سے آخے ہُن یو مسلہ ضرور حل ہوئی ایہسی، اخباریچ خبر لغی گئی۔ سچی دسیاں او حل ہونا وی سا۔ ہُن تے تُس برقیاں نے برقے لخی لخی کالے کرنے واہا، حرام کدیہہ کُسیہہ نی پسیم وی ہَلنی۔ ممتاز غزنی صاو وچ لِخے نی تحریک پیدا کیتے والے راجہ انور صاو وی دے جیہڑے اُنھیں نےکہریچ اُس ویلیئے اخبار ہِنی آئے سے جدوں کُسیہہ کُسیہہ نے کہر ایہ اخبار ایہنا سا۔ ممتاز غزنی صاو آپنی پہلی کتاب ‘‘ماں تجھے سلام‘‘ آپنیاں اماں نے باریچ کُتیہہ زمانہ طالب علمی وچ لِخی دی۔ دُوئی کتاو ‘‘بچپن لوٹا دو‘‘ جیہڑی میں تک وی پُجی ہیک خوبصورت تخلیق دی جس وچ اُبھیں آپنے بچپن نیئیں اُنھیں چیزیں ،لوکیں اور رسم و رواج نے باریچ لِخیا جیہڑے ہُن نایاب ہوئی اے۔ اُنھیں نی پہاڑی نی پہلی تے مجموعی طور اُپر ترِیئی کتاو ‘‘بکھیاں دوہریاں؛؛ دی۔ چوتھی کتاو ‘‘دھرتی کا عظیم مزاحمت کار‘‘ ساڑے پاسے نے ہیک آزادی پسند رہنما سردار آفتاب مرحوم نے باریچ مخلف لوکیں نے مضامین نا ہیک مجموعہ دا جیہڑا اُنھیں ترتیب دیتا نا۔ پنجویں کتاو ‘‘سِکھاں‘‘ پہاڑی وچ دی، چھٹی ‘‘ چروکنی گل‘‘ تے ستویں ‘‘پہوچھن‘‘ وی پہاڑی وچ دی۔ اُنھیں نیاں دو تریہہ کتاواں جیہڑیاں میں پڑھیئاں، ہر ہیک اس قابل دی کہ اُسِیر لادا لادا تبصرہ لِخنو ویہہ فہ کیہہ کراں روٹھی بیہل کھاناں آناں تے یو سعادت حاصل کراں۔ مہاڑا حال وی اُوییہہ دا آخے ‘‘گایا بہوں دل اینا فہ گڑیں ماریُوس‘‘۔ ممتاز غزنی صاو ٹہیر ہیک ایوارڈیں نا وی لَبا نا جہڑے اُنھیں نیئیں ادبی خدمات اُپر اُنھیں زیادہ تر لہور وچ مختلف ادبی تنظیمیں نیاں طرفا لبے۔ ساڑی بدقسمتی کہ آنسیں نیاں طرفا اُنھیں کی کوئی ایوارڈ شیوارڈ دِینا تے دُوریہہ نی گل، آنس اُنھیں نے اعزاز وِچ کوئی تقریب تک وی منعقد نیاں کرائی سکے۔ ہُن اُنھیں ممتاز پبلی کیشننز نے نائیں کنے ہیک اشاعتی ادارہ وی بنایا نا، جیہڑا اس ویلے تک درجناں کتاواں شائع کری چُکیا۔ ہیجے لوک ساڑا سرمایہ دے۔ اِنھیں نی قدر کِیتی جانی چاہینی تے انھیں نیئیں خدمات نا اعتراف اِنھیں نیئیں حیاتیئیں وچ ایہہ کیتیا جانا چاہینا ورنہ جدوں اے ٹُری آچھین تے پِچھیہہ رونا رواس تے خراجِ عقیدت نیاں میل میل لمبیاں تقریراں کس کاری۔
