اختر شہاب
آج عید کا دوسرا دن تھا۔۔۔ شام کے وقت اس کی بہن اور بھائی اپنے بچوں کے ہمراہ عید ملنے آئے۔۔۔ اس کی بیوی بیماری کی وجہ سے کام نہیں کر پا رہی تھی۔۔۔ سو اس کا بیٹا مہمانوں کے لئے چائے بنانے کچن میں گیا۔۔۔
بیٹےکی پھپھو نے یہ دیکھا تو اپنی محبت اور شفقت کی وجہ سے پھڑک کر رہ گئیں۔۔۔ بولیں ۔۔۔ “اسے چائے بنانا آتا ہے، تو کھانا بھی بنا لیتا ہوگا۔۔۔ اچھا ہے لڑکوں کو کچن دیکھنا بھی آنا چاہئے۔۔۔”
پھوپھی زا د بہنیں بھی محبت کے مارے اپنی اپنی کرسیوں سے چپکی رہیں اور ہنسی مذاق کرتی رہیں ۔۔۔
دیکھتی تو بیٹے کی چچی بھی رہی۔۔۔ مگر چائے ختم ہوئی تو چچی روکنے کی باوجود برتن اٹھا کے دھونے چلی گئی۔۔۔ بیچاری! نئی نئی جو تھی۔۔۔ اسےاپنوں کے پروٹوکول کا اتناعلم نہ تھا۔۔۔
حالانکہ دوپہر میں اس کے ایک دوست بمع بیگم تشریف لائے تھے۔۔۔ بھابھی کے علم میں جب آیا کہ اس کا بیٹا چائے بنا رہا ہے تو ناراض ہوگئیں۔ ۔۔ خود چائے بنانے پہنچ گئیں۔۔۔ بڑی مشکل سے انھیں چائے کے بجائے، ٹھنڈا شربت پلا کر ٹھنڈا کیا گیا۔۔۔!
قول زریں ۔۔۔۔ *سچ ہے اپنے اپنے ہی ہوتے ہیں
⃝●●●⃝
