معظّمہ نقوی کی آزاد اور نثری نظموں کا مجموعہ ’’آخری بارش‘‘ کے جمالیاتی عنوان سے میرے سامنے آیا ہے تو یکایک میرے ذہن میں ماضی کی کئی ایسی شاعرات کے نام گونج اٹھے ہیں جو نثری نظموں کے حوالے سے اُردوادب کی کائنات میں اپنانمایاں نقش ثبت کر گئی ہیں مثلاً کشور ناہید، سارا شگفتہ، عذرا عباس،منصورہ احمد،ثمینہ راجا، نجمہ منصوروغیرہ۔اَور مَیں نے معظمہ نقوی کی نظموں کا جائزہ اسی تناظرمیں لیا کہ آیا انہوں نے اپنی نظموں میں اب فرسودہ ہوچکنے والے موضوعات اور بارہا دہرائی گئی شعری تراکیب دہرائی ہیں یا کچھ نیا بھی کہا ہے۔مُجھے خوشی ہے کہ ان نظموں کے بالاستیعاب تجزیاتی مطالعے کے بعدمیرے اندر کے سخت گیر ناقد نے جواب میں یہی کہا کہ ان کی نظموں کا تقابلی جائزہ لینے کی کوئی ضرورت نہیں کہ اُنہوں نے جو بھی کہا ہے، اپنے منفرد انداز میں کہا ہے اور جو موضوعات اُنہوں نے چُنے ہیں وہ بھی نئے اور اچھوتے ہیں۔اگر کہیں کسی پُرانے موضوع پر کچھ کہا بھی ہے تو اُسے اس کمال سے نئے الفاظ اور استعاروں میں بیان کیا ہے کہ وہ موضوع بھی نیا اور جدید ترین لگنے لگا ہے۔

                    ایک بات کتاب کے عنوان سے ذہن میں آتی ہے، کہ معروف اور رجحان ساز غزل گو شاعر ناصر کاظمی کی کتاب کا عنوان ’’پہلی بارش‘‘ تھا، ابھی پچھلے دنوں ایک اور شاعر کی غزلوں کا مجموعہ ’’دوسری بارش‘‘ کے عنوان سے دیکھاتو محسوس ہوا کہ اب بارش کے لفظ کی گنتی غزلیہ خطے میں ہونے لگی ہے اور دیکھیے یہ’’بارش سیریز‘‘ کا سلسلہ کہاں جا کر تھمے، مگر معظّمہ نقوی نے ان’’غزلیہ حملوں‘‘ کے مقابلے میں اپنی نظموں کے مجموعے کو ’’آخری بارش‘‘ کا عنوان دے کر جہاں ایک طرف بارشوں کے سلسلے پر اپنے عنوان کی حتمی نوعیت سے صنفِ غزل اور غزل گو شعراء کی اجارہ داری ختم کر دی، وہیں نئے تخلیقی رجحانات میں آزاد اور نثری نظموں کو مستقبل کی جدید تر اصناف قرار دے کر یہ اعلان کر دیا کہ اب آزاد اور نثری نظموں کی عدم قبولیت کا دور ختم ہو چکا ہے۔ یہ غنیمت ہے کہ معظمہ نقوی نے اُس تنگ نظری پر مبنی غزل پسندی کے دَور کے بعد جنم لیا جب آزاد نظموں کوکسی حد تک اور نثری نظموںکو یکسر شاعری سمجھا ہی نہیں جاتا تھا بلکہ کئی مکاتبِ فکر تو انہیں نثرِ لطیف کہتے اور انہیں ایک تخلیقی صنف تو تسلیم کرتے تھے مگر شعر ی صنف نہیں مانتے تھے بلکہ اسے نثر کی نسبت سے عنوان دیتے تھے۔لیکن نثری نظم کومکمل رد کرنے والوں نے جب دیکھا کہ صحیح تخلیقی شاعر اور شاعرات اس صنف کو ’’شارٹ کٹ‘‘ کے طور پر نہیں برت رہے بلکہ مرزا غالبؔ کے الفاظ میں ’’کچھ اور چاہیے وسعت مرے بیاں کے لیے‘‘ کے تحت اس وسعتِ بیاں کو اس نئی صنف کے جواز کے طور پر پیش کر رہے ہیں، تو بالآخر نثری نظم کی شد و مد سے مخالفت کرنے والے بھی اس کے ’’جینوئین‘‘ ہونے اور اس کے امکانات کی وسعت کے معترف ہو گئے۔ اس لحاظ سے معظمہ نقوی بھی ان نظم گو شعرا ء و شاعرات کی صف میں نمایاں طور پر کھڑی نظر آتی ہیں جنہیں نثری نظم کو تسلیم شدہ شعری صنف کے طور پر منوانے کا کریڈٹ جاتا ہے۔ ان نظموں میں ایک ایسی نغمگی ہے جو غزل کے سریلے پن اور موسیقیت کے قائل قاری کا د ل بھی لبھاتی ہیں اور اسے احساس دلاتی ہیںکہ اصل نغمگی غزل،پابند نظم، آزاد نظم یا نثری نظم میں نہیں ہوتی، بلکہ ا س کا اوّلیں ماخذ ومنبع تخلیق کار کا خیال ہوتا ہے، اب یہ قاری کاابلاغی مسئلہ جانیے کہ اس نے کچھ عروضی اوزان و بحور میںتو یہ نغمگی اور رِدھم دریافت کر لی مگرابھی اس کائنات کی بہت سی نغمگی اور رِدھم ابھی نادریافت ہے، اور اس صورتِ حال کا شکار آزاد نظم اور نثری نظم خاص طور پر ہیں جبکہ آزاد نظم کسی حد تک پابند قافیوں اور برابر کے مصرعوں کی بدولت قاری کی غنائیت اور نغمگی کے ذوق کی گرفت میں آ جاتی ہے۔

                     اس مجموعے میں نثر ی نظموں کے ساتھ ساتھ کچھآزاد نظمیں بھی شامل ہیں جن کی مترنم بحریں دلآویز ہے اور جن کی دلکشی موضوع کے کھردرے پن اورباغیانہ پن کو ایک نیم شفّاف پردے میں چھپا کر سچائی کو اپنے پورے حسن کے ساتھ اجاگر کرنے لگتی ہے۔ان کی نظم نثری ہو یا آزاد، اپنے موضوع کی نوعیت کے لحاظ سے پوری پوری تخلیقی ہنر کاری کے رنگ میں رنگی ہوئی ہوتی ہے، ان کی کئی نظمیں پڑھنے سے یہ بھی محسوس ہوا کہ وہ غزل کی صنف میں بھی لکھ سکتی تھیں مگر ترجیحاً آزاداور نثری نظم لکھی، ان کی کچھ نظموں میں دو دو مصرعے ایسے ہیں جنہیں ایک مکمل شعر کہا جا سکتا ہے، مثلاً کچھ نظموں کے یہ دو مصرعی ٹکڑے دیکھیے:

                                                            ہستیاں وہ جو کوچ کر جائیں                      وہ کبھی لوٹ کر نہیں آتیں

                                                            دکھ تو یہ ہے کہ سب ادیبوں پر               ظلم کے تیر پھینکے جاتے ہیں

                    ایک اعلیٰ تعلیم یافتہ ہونے اور جدید ادبی رجحانات سے آگاہ ہونے کے باعث ان کی نظموںمیں کچھ لفظی تراکیب اور انگریزی الفاظ بھی بڑے سلیقے سے استعمال ہوئے ہیں جنہیں پڑھ کر نامانوسیت کا احساس نہیں ہوتا بلکہ ان کی نظموں کے طفیل یہ جدید شعری لغت کے ذخیرے میں شامل ہو جاتے ہیں۔ چند ایسی لفظی تراکیب ملاحظہ ہوں: لِنک ریز، ریگِ پُرسرد، مضرابِ رگِ جاں، پائمالِ صد ستم، صحرائے خواہشات، آبِ گل رنگ۔  اسی طرح  ,

Nostalgia ;First Anniverrsary,Midnight,gossip

جیسے انگریزی الفاظ بھی ان نظموں میں برتے جانے کے بعد ہمارے لیے اجنبی نہیں رہتے

                    ان کی کچھ نظموںکے مختصر اقتباسات سے ان کی موضوعی گرفت کا اندازہ کیا جا سکتا ہے۔مثلاً

                                        جنگل میں بھی ہریالی آئی ہے    ؍     پتا پتا بجا رہا تالی ہے  ؍

                                        مگر میرے ساجن میں نے تمہاری یاد میں ؍  اپنی زندگی دکھوں سے سجا لی ہے    (نظم: بسنت)

                                        بھٹکتے جیون کے رہنما ہو   ؍  کہ میری ایک بے نتیجہ خواہش کا تم

                                        ؍  مکمل ایڈریس ہو ہمدم                                                                                                         (نظم ’’تُم‘‘)

                                        جانے کیوں بے خبر ستارے نے  ؍    چاند کو پوجنے کا سوچا ہے  ؍

                                        اس ستارے کو بتایا میں نے                                        ؍ چاند اس کا نہیں پرایا ہے                     (نظم ’’ایک تارے کے نام‘‘

                    معظمہ نقوی کی ان نہایت ہی تخلیقی زرخیزی کی حامل تلخ سچائیاں بیان کرتی بیباک نظموں میں بھی اُن کے لہجے کی سندرتا اور شائستگی برقرار ہے اور لگتا ہے کہ انہوں نے  بڑی بے ساختہ سادگی کے ساتھ یہ نظمیں عہدِ جدید کی سنگی الواح پر لکھ کر انہیں امر کر دیا ہے۔ ان نظموں میں جذبے اور خیال کی فروانی کے ساتھ ساتھ الفاظ کی ایسی تزئین و آرائش قابلِ ذکر ہے جسے آورد کی بجائے آمد کہا جا سکتا ہے، اس کی نظموں میں ایسی جاذبیت، موضوع کی فنکارانہ عکاسی اور تخلیقی گہرائی ملتی ہے جس کی مثال ماضی قریب کی کسی نثری نظم گو شاعرہ میں کم از کم میری نظروں سے نہیں گزری۔ چنانچہ میں معظمہ نقوی کو نثری نظم کی کائنات میں ایسی بھرپور آمد پر اُن کا خیر مقدم کرتا ہوں۔

                                        ۔۔۔۔۔۔۔۔۔۔۔۔۔۔

                                                                                                                        نسیمِ سحرؔ

                                                                                                                                                                                        ۴؍ جنوری ۲۰۲۵ء


Discover more from Press for Peace Publications

Subscribe to get the latest posts sent to your email.

Comments

Discover more from Press for Peace Publications

Subscribe now to keep reading and get access to the full archive.

Continue reading

×

Send a message to us on WhatsApp

× Contact
Skip to content