اردو کا گلاب لہجہ تاثرات : حفص نانی

مصنفہ: آرسی رؤف
تاثرات : حفص نانی

چند دن ہوئے ، پریس فار پیس پبلی کیشنز کی طرف سے آرسی رؤف کی نئی کتاب ” اردو کا گلاب لہجہ” موصول ہوئی ۔ یہ کتاب واقعی اس قابل ہے کہ اسے غور اور توجہ کے ساتھ پڑھا جائے ۔ یہی وجہ ہے کہ میں نے اس کتاب کی ہر ایک کہانی دو مرتبہ پڑھی ؛ ایک مرتبہ اپنی نظر سے اور دوسری مرتبہ بچوں کی نظر سے ۔
بلا شبہ آرسی نے اردو زبان کا تعارف ایک انوکھے انداز میں کروایا ہے ۔ اس کتاب کی مختصر کہانیاں مکالموں کے ساتھ ہیں ۔ اگر بڑے بچے ان کہانیوں کو کھیل کی شکل پیش کریں تو چھوٹے بچوں کے لیے یہ ایک دلچسپ انداز ہو گا ۔ کتاب کے آخر میں ایک ناولٹ ” کہاوتوں کی جادو نگری” ہے ۔ کہاوتوں اور ضرب الامثال سے تخلیق کردہ ناولٹ ” ایک پنتھ دو کاج” ہے ، تفریح کی تفریح اور تعلیم کی تعلیم!
میری رائے میں یہ کتاب سب سے پہلے والدین کو پڑھنا چاہیے ۔ ان کہانیوں سے گرمیوں کی چھٹیوں میں محلے کے بچوں کے ساتھ بہترین سرگرمی ترتیب دی جا سکتی ہے اور ….. ناولٹ ! وہ تو خاصے کی اور سنانے کی چیز ہے ۔
کتاب کے اختتام پر پانچ سرگرمیاں ہیں اور پانچوں انتہائی دلچسپ ہیں ۔ والدین اور بڑے بہن بھائیوں کی مدد سے بچے اِن سے بہت لطف اندوز ہوں گے ۔
امید ہے اردو سے محبت کرنے والے والدین اس کتاب کی خریداری پر ضرور توجہ دی دیں گے ۔